خیبر پختونخوا حکومت نے سیلاب زدہ علاقوں میں آبپاشی کی بحالی اور سیلابی تحفظ کے منصوبوں کی مالی اعانت کے لیے ورلڈ بینک سے قرض لینے کا فیصلہ کیا ہے، یہ تجویز صوبائی کابینہ کے آئندہ اجلاس میں منظوری کے لیے پیش کی جائے گی۔
خیبر پختونخوا حکومت نے صوبے کے سیلاب متاثرہ علاقوں میں انفراسٹرکچر مضبوط کرنے، تباہ شدہ آبپاشی نظام کی بحالی اور مستقبل کے سیلابوں سے نبٹنے کی صلاحیت بہتر بنانے کے لیے عالمی بینک سے قرض حاصل کرنے کی حکمتِ عملی اپنائی ہے۔
یہ مالی اعانت کی درخواست صوبائی کابینہ کے ایجنڈے میں شامل کی گئی تھی تاہم کابینہ کا اجلاس ملتوی ہو جانے کی وجہ سے یہ تجویز اب آئندہ اجلاس میں منظوری کے لیے پیش کی جائے گی۔
حکام کا کہنا ہے کہ مجوزہ فنڈنگ کا مقصد نہ صرف موجودہ نقصانات کی تلافی ہے بلکہ ایسے حفاظتی ڈھانچے قائم کرنا بھی ہے جو آئندہ موسمی آفات کے دوران جانی و مالی نقصانات کو کم کریں۔
کابینہ کے آئندہ ایجنڈے میں ایک اور اہم معاملہ ضلع چارسدہ میں نئی تحصیل “عمرزئی” کے قیام کی منظوری کا مسودہ بھی شامل ہے۔ اسی اجلاس میں خیبر پختونخوا پولیس کاؤنٹر ٹیرر ازم وِنگ سروس رولز 2026ء میں ترامیم کی سفارشات بھی زیرِ غور آئیں گی۔
مزید برآں صوبائی حکومت پشاور میں جنوبی ایشیائی کھیلوں کے تین ایونٹس کے انعقاد کی تجویز اور اُن مقابلوں کے انعقاد کے لیے درکار فنڈز کی منظوری بھی کابینہ کی غور و فکر کا حصہ ہوگی۔
صوبائی حکومت کا کہنا ہے کہ قرض کی منظوری اور دیگر ایجنڈا آئٹمز کابینہ کے اگلے اجلاس میں تفصیلی بحث کے بعد حتمی شکل اختیار کریں گے۔
