کراچی (کامرس رپورٹر) معروف کارپوریٹ لاء فرم اخوند فوربز کے رابل اخوند نے کونکلیویٹی کا آغاز کر دیا ، یہ تجارتی قانونی ذہانت کا پلیٹ فارم ہے جو خاص طور پر پاکستانی قوانین، ضوابط اور ترامیم پر مبنی ہے اور وکلاء، کارپوریٹ مشیروں اور صنعتکاروں کو تیز دسترس فراہم کرنے کے لیے ڈیزائن کیا گیا ہے۔
اخوند فوربز کے بانی رابل اخوند نے کراچی میں منعقدہ ایک تقریب میں کونکلیویٹی کو متعارف کرایا۔ ماہرین کے مطابق یہ ملک کی پہلا تجارتی سطح کا قانونی اے آئی پلیٹ فارم ہے جو پاکستانی قانون پر تیار کیا گیا ہے۔ تقریب میں سندھ ہائیکورٹ کے جسٹس یوسف علی سید کے علاوہ وکلاء، بینکنگ اور صنعت کے سینئر نمائندے شریک تھے۔
پلیٹ فارم کا بنیادی نکتہ یہ ہے کہ عام مقاصد کے لیے استعمال کیے جانے والے اے آئی ماڈلز انٹرنیٹ کے عام مواد پر تربیت یافتہ ہوتے ہیں اور اکثر اُن کا حوالہ اُن عدالتی یا قانونی نظاموں تک محدود رہتا ہے جو آن لائن زیادہ نمائندگی رکھتے ہیں جس کے نتیجے میں پاکستانی وکیل ایسے جوابات دیکھتے ہیں جو انگریزی یا امریکی تصورات سے متاثر ہوتے ہیں یا ایسے حوالہ جات پاتے ہیں جو ترمیم شدہ یا منسوخ دفعات پر مبنی ہوتے ہیں۔ کونکلیویٹی اِس مسئلے کو یوں حل کرتا ہے کہ اِس کے مرکز میں پاکستانی آئین، قوانین، ضوابط اور اُن کی ترامیم کا ایک تسلسل برقرار رکھا جانے والا ڈیٹا بیس ہے جس سے جوابات موجودہ نافذ آئین، قانون اور ضابطے کے تحت تیار ہوتے ہیں۔
پلیٹ فارم مشورہ دینے، مسودہ تیار کرنے اور دستاویزات کا جائزہ لینے کے لیے تیار کیا گیا ہے۔ مشاورتی عمل میں یہ مخصوص قانونی سوالات کے جوابات دیتا ہے اور ہر جواب کے ساتھ متعلقہ قانونی شق کا حوالہ فراہم کرتا ہے جبکہ مسودہ تیار کرنے میں یہ معاہدے، نوٹس اور بورڈ قراردادوں کے ابتدائی مسودے تیار کرتا ہے، جائزے کے مرحلے میں یہ دستاویزات کو نافذ العمل قوانین کے خلاف پڑھ کر وہ نکات نمایاں کرتا ہے جہاں قانون کی ضرورت پوری نہیں کی گئیں۔
رابل اخوند کا کہنا تھا کہ کونکلیویٹی پاکستان میں پیدا اور تیار کیا گیا ہے، اِس کا مقصد وکلاء کو تبدیل کرنا نہیں بلکہ وکالت کے معیار کو بلند کرنا ہے تاکہ وسیع پھیلاؤ میں معیاری قانونی خدمات دستیاب ہوں۔ انہوں نے کہا کہ پلیٹ فارم وکلاء کی درجہ بندی یا فیصلے کی جگہ نہیں لے گا اور رازداری کو ڈیزائن کا لازمی جزو بنایا گیا ہے۔
جسٹس یوسف علی سید نے کہا کہ برسوں سے وکلاء اور جج اِس قسم کے وسائل کے خواہاں رہے ہیں اور کونکلیویٹی کا نقطہِ نظر تصدیق شدہ حوالہ جات فراہم کر کے اے آئی کے ممکنہ خطرات کو کم کرنے کا وعدہ کرتا ہے۔ نشست کے اختتام پر عارف حبیب گروپ کے نسیم بیگ نے کہا کہ اے آئی نے زندگی بدل دی ہے مگر قانون میں انسانی رابطہ برقرار رہے گا کیونکہ مشینی کام عام ہو کر لوگوں کو پیچیدہ مسائل پر توجہ دینے کی گنجائش دے گا۔
کونکلیویٹی ابتدائی طور پر قانونی ٹیموں اور کارپوریٹ کلائنٹس کے ایک محدود گروپ کو دستیاب ہوگا جن کے فیڈبیک کی بنیاد پر اس میں توسیع اور قانون کے دائرے سے آگے کے مواد شامل کیا جائے گا۔ پلیٹ فارم اخوند فوربز کی قیادت میں رابل اخوند کے تجربے کو مدِنظر رکھتے ہوئے تیار کیا گیا ہے۔
