میٹا فیس بُک ٹک ٹک بننے جا رہی ہے؟؟؟

لاہور (مانیٹرنگ ڈیسک) میٹا نے فیس بک میں ’’ری امیجن ایکسپرینس‘‘ نامی ایک نیا تجربہ آزمانے کا اعلان کیا ہے جس میں ایپ کھولتے ہی فُل سکرین ویڈیو فیڈ میں دکھائی جائے گی یعنی فیس بک کا مرکزی انٹرفیس اب ’’ٹک ٹاک طرز‘‘ کا دکھائی دے گا۔

فیس بُک کی مالک ’’میٹا‘‘ نے اعلان کیا ہے کہ وہ اپنے مشہور سوشل نیٹ ورک میں ایسی تبدیلی لا رہا ہے جو اُس کے استعمال کا بنیادی تجربہ بدل دے گی۔ جیو نیوز کے مطابق میٹا کمپنی اس تجربے کو رواں سال چند محدود ممالک میں متعارف کرائے گی جبکہ صارفین کلاسیک فیڈ پر واپس بھی جا سکیں گے۔

کمپنی کا کہنا ہے کہ یہ تبدیلی صارفین کی پسند کے مطابق ہے کیونکہ ’’ویڈیو ہی کو سب سے زیادہ ترجیح دی جاتی ہے‘‘ اور اِسی بنا پر وہ ویڈیو فرسٹ فیڈ تیار کرنے جا رہی ہے۔ میٹا نے میڈیا کو بتایا کہ متعلقہ ٹولز کی تیاری کے ساتھ ساتھ وہ لوگوں کو ایسا تجربہ فراہم کرنا چاہتے ہیں جو تفریح کے ساتھ ساتھ اُنہیں مستند کریٹیرز سے جوڑ سکے۔

اس نئے اِنٹرفیس کی منظرکشی یا تصویری مثال اگرچہ میٹا نے ابھی جاری نہیں کی تاہم کمپنی نے واضح کیا ہے کہ یہ ویڈیو فرسٹ فیڈ پہلے اُن محدود ممالک میں متعارف کرائی جائے گی جہاں کے صارفین ویڈیوز کو زیادہ ترجیح دیتے ہیں۔ اس بارے میں حتمی ممالک یا ٹیسٹنگ کی تاریخوں کی مزید تفصیلات فراہم نہیں کی گئیں۔

میٹا یہ بھی کہتی ہے کہ جو صارفین نئی ویڈیو فیڈ پسند نہیں کریں گے وہ اسے چھوڑ کر واپس کلاسیک فیس بک فیڈ پر لوٹ سکتے ہیں۔ فیس بک کی پرانی فیڈ بدستور نیوی گیشن میں سیکنڈری ٹیب میں دستیاب ہوگی۔

صحافتی حلقوں میں اِس اقدام کو فیس بک کی جانب سے مختصر مدت میں زیادہ ویڈیو کونٹینٹ پر زور دینے کی کوشش کے طور پر دیکھا جا رہا ہے جبکہ تجزیہ کار کہتے ہیں کہ یہ سٹریٹیجی ٹک ٹاک کے فل سکرین فارمیٹ کی کامیابی کا جواب معلوم ہوتی ہے کیونکہ ٹک ٹاک نے اِسی انداز کو اپنی ایپ کا بنیادی حصہ بنایا تھا۔

میٹا کے اعلان کے بعد صارفین اور کریئیٹرز کے ردِعمل اور کمپنی کی طرف سے ٹیسٹنگ کے دوران دی جانے والی مزید تکنیکی وضاحتوں کا انتظار باقی ہے۔