زیمبیا میں تین نر افریقی جنگلی کتوں کے ایک غول نے ساتھی تلاش کے لیے مجموعی طور پر 2,485 میل (4,000 کلومیٹر) کا ریکارڈ ساز سفر مکمل کیا، ماہرین نے کہا ہے کہ یہ خشکی پر رہنے والے کسی بھی افریقی ممالیہ کا طویل ترین درج شدہ سفر ہے۔
ایک تحقیق میں بتایا گیا ہے کہ افریقی جنگلی کتوں کے تین بھائیوں پر مشتمل غول نے زیمبیا کے اندر پیچیدہ، بل کھاتی ہوئی راستوں سے گزرتے ہوئے مجموعی طور پر 2,485 میل (4,000 کلومیٹر) کا غیر معمولی سفر مکمل کیا۔ سائنس دانوں کے مطابق یہ دورانیہ ساتھی کی تلاش کے لیے ممالیہ جانوروں کی جانب سے اب تک ریکارڈ کیا گیا سب سے طویل سفر ہے۔
ماہرین نے واضح کیا کہ اگر ان تینوں نر کتوں کے آٹھ ماہ پر محیط سفر کو سیدھی لائن میں کھینچا جائے تو وہ تقریباً 260 میل (420 کلومیٹر) بنتا ہے، تاہم زمینی راستوں کی پیچیدگی نے ان کا مجموعی سفر اس سے تقریباً دس گنا زیادہ، یعنی 4,000 کلومیٹر تک پہنچا دیا۔
تحقیقاتی ڈیٹا سے پتہ چلتا ہے کہ غول نے زیمبیا کے اہم جنگلی علاقوں کے درمیان نقل و حرکت کی اور انسانی آبادی اور صنعتی ترقی کے سبب بننے والی بڑی رکاوٹوں، جن میں دارالحکومت لوساکا بھی شامل ہے، سے بچتے ہوئے سفر مکمل کیا۔ اس مشاہدے سے یہ تاثر مضبوط ہوتا ہے کہ مشرقی اور جنوبی افریقہ میں افریقی جنگلی کتوں کی مختلف آبادیاں ممکنہ طور پر ایک دوسرے سے پہلے کے اندازوں سے زیادہ منسلک ہیں۔
تاہم محققین نے خبردار کیا ہے کہ اس طویل سفر کے دوران خطے میں موجود خطرات نمایاں رہے۔ جی پی ایس کالر سے ٹریک کیے گئے دیگر جنگلی کتوں میں سے بعض غیر قانونی شکار کے پھندوں میں پھنس کر ہلاک ہو گئے، جبکہ تین مادہ بہنوں میں سے دو اسی دوران ہلاک ہو گئیں۔
تحقیقی مقالے کے مرکزی مصنف پروفیسر اسکاٹ کریل، جو مونٹانا سٹیٹ یونیورسٹی سے وابستہ ہیں، نے کہا کہ یہ دریافت کچھ امید پیدا کرتی ہے مگر تصویر کے مثبت اور منفی دونوں پہلو موجود ہیں۔ ان کے مطابق یہ ممکن ہے کہ زیادہ تر بڑی آبادیاں ایک دوسرے سے منسلک ہوں، سوائے ان کے جو باڑوں میں محدود ہیں۔
دی نیچر کنزروینسی کے کافو کنزرویشن پروگرام کے ڈائریکٹر بروس ایلینڈر نے کہا کہ وسیع رینج میں نقل و حرکت کرنے والے جانوروں، جیسے جنگلی کتے اور ہاتھی، اپنی بقا کے لیے باہم منسلک رہائش گاہوں کے محتاج ہوتے ہیں۔ اُن کا کہنا تھا کہ محفوظ علاقوں کو الگ تھلگ سمجھ کر طویل مدت کے لیے تحفظ کی توقع نہیں کی جا سکتی اور وسیع تر منظرنامے میں منصوبہ بندی ضروری ہے۔
اس تحقیق کی روشنی میں ماہرین نے مشورہ دیا ہے کہ محفوظ جنگلی علاقوں کے باہر بھی قدرتی راہداری قائم کیے جائیں تاکہ سڑکوں، بستوں اور زرعی زمینوں کی وجہ سے جدا ہو جانے والے قدرتی علاقے دوبارہ منسلک ہو سکیں۔
