جشنِ آزادی کی رات مختلف شہروں کی تقریبات کے دوران ہوائی فائرنگ اور ہنگاموں میں شیر خوار بچے سمیت تین ہلاک اور سینکڑوں افراد زخمی ہو گئے جبکہ پولیس نے سینکڑوں مشتبہ افراد کو بھی گرفتار کر لیا۔
پولیس سرجن نے میڈیا کو بتایا کہ فضائی فائرنگ کے واقعات میں ایک مرد اور ایک شیر خوار بچہ ہلاک ہوئے جبکہ ایک خاتون کو بھی گولیاں لگنے سے زخمی ہوئی جسے ہسپتال لایا گیا تاہم وہ جانبر نہ ہو سکی۔
ایدھی سروس کے مطابق کراچی کے مختلف حصّوں میں ہونے والی ہوائی فائرنگ کے نتیجے میں 86 افراد زخمی ہوئے۔ اِن میں 59 مرد، 17 بچے اور 10 خواتین شامل ہیں۔
پولیس نے ہوائی فائرنگ کے خلاف کارروائیاں تیز کرتے ہوئے مشرقی ضلعے سے 10 مشتبہ افراد کو گرفتار کیا اور اُن کا مبینہ استعمال شدہ اسلحہ بھی ضبط کر لیا گیا۔ یہ گرفتاریاں گلشنِ اقبال، شارعِ فیصل، سچل، گلستانِ جوہر اور سائٹ سپرہائی وے پولیس سٹیشنوں کی حدود میں عمل میں آئیں۔ مغربی ضلع کی پولیس نے الگ طور پر فضائی فائرنگ کے واقعات میں تین مشتبہ افراد گرفتار کیے۔
رپورٹ میں کہا گیا ہے کہ یومِ آزادی اور نئے سال کی تقریبات کے دوران جشن کے نام پر فائرنگ پابندی کے باوجود مستقل مسئلہ بنی ہوئی ہے جبکہ لاہور اور کراچی سمیت چھوٹے بڑے شہروں میں لڑائی جھگڑے بھی رپورٹ ہوئے۔
گزشتہ سال بھی یومِ آزادی کے موقع پر ہوائی فائرنگ کے باعث تین افراد ہلاک جبکہ سو سے زائد زخمی ہو گئے تھے۔
