کراچی (سٹاف رپورٹر) گُڈز ٹرانسپورٹروں نے پیٹرولیم مصنوعات کی قیمتوں میں حالیہ اضافے کے بعد کرائے میں پانچ فیصد اضافہ کرنے کا اعلان کرتے ہوئے کہا ہے کہ حکومت کی روزانہ بنیاد پر تیل کی قیمتیں تبدیل کرنے کی پالیسی فوری واپس لے وگرنہ 40 روز بعد ملک گیر ہڑتال کی جائے گی۔
گُڈز ٹرانسپورٹرز کے صدر ملک شہزاد اعوان نے ایندھن کی قیمتوں میں اضافے کی سخت مذمت کرتے ہوئے حکومت کی طرف سے ‘‘روزانہ بنیاد’’ پر قیمتیں تبدیل کرنے کے فیصلے کو ناقابلِ قبول قرار دیتے ہوئے اِس کی واپسی کا مطالبہ کر دیا۔
اُن کا کہنا تھا کہ ملک گیر ہڑتال کو 40 روز کے لیے ملتوی کیا تھا تاکہ حکومت اُن کے مطالبات پورے کرے لیکن زیادہ تر مطالبات اب تک حل نہیں ہوئے، اگر مقررہ مدت میں معاملات میں خاطر خواہ پیشرفت نہ ہوئی تو دوبارہ ملک گیر ہڑتال کا آغاز کیا جائے گا۔
اعلان میں حکومت سے فوری مذاکرات اور کرایوں میں اضافے کے اثرات کم کرنے کے لیے قابلِ عمل اقدامات کا مطالبہ بھی سامنے آیا ہے۔ ٹرانسپورٹروں کے فیصلے سے رسد اور نقل و حمل کے اخراجات کے علاوہ اشیائے ضروریہ کی قیمتیں متاثر ہو سکتی ہیں۔
