اسلام آباد (سٹاف رپورٹر) نیشنل ہائی وے اتھارٹی (این ایچ اے) نے اپنی تمام سرکاری اراضی سے قبضے ختم کرانے کا فیصلہ کیا ہے۔
یہ ہدایات وفاقی وزیر برائے مواصلات عبدالعلیم خان نے ٍاعلیٰ سطح کے اجلاس کی صدارت کرتے ہوئے دیں جن میں کہا گیا کہ این ایچ ای کی تمام سرکاری اراضی سے غیر قانونی قبضہ ختم کرایا جائے جبکہ قومی شاہراہ N-5 کی مرمت کو بحالی کا کام فوری سر انجام دیا جائے۔
اُن کا کہنا تھا کہ ادارے کی قبضہ مافیا کے خلاف ’’زیرو ٹالرنس‘‘ پالیسی ہے، ملک میں کسی بھی جگہ این ایچ اے کی ایک انچ زمین بھی کسی کے غیر قانونی قبضے میں نہیں رہنی چاہیے۔
اجلاس میں وفاقی سیکرٹری مواصلات، چیئرمین این ایچ اے اور سینئر انتظامی افسران نے شرکت کی اور ملک بھر میں جاری ترقیاتی منصوبوں پر تفصیل سے بریفنگ دی۔
قومی شاہراہ N-5 کی خراب صورتحال پر تشویش کا اظہار کرتے ہوئے وفاقی وزیر عبدالعلیم خان نے اِس کی فوری بحالی کے حکم کے علاوہ لاہور۔گوجرانوالہ جی ٹی روڈ کے سیکشن پر مرمت کا کام ’’پیچ ورک‘‘ (مرمت) تیزی سے مکمل کرنے کی ہدایت بھی کی۔
۔
