محکمہ اطلاعات و ثقافت پنجاب نے مبینہ فحش رقص اور نامناسب اشاروں کے الزام میں آٹھ سٹیج اداکاراؤں پر ایک ماہ کے لیے تھیٹر شوز کرنے پر پابندی عائد کر دی ہے۔
لاہور (مانیٹرنگ ڈیسک) محکمہ اطلاعات و ثقافت پنجاب کے مطابق یہ پابندی پنجاب کونسل برائے فنون کی مانیٹرنگ رپورٹ کی بنیاد پر نافذ کی گئی، جاری نوٹیفیکیشن میں کہا گیا ہے کہ فلم اور تھیٹر پروگراموں میں مبینہ طور پر بدنما اور غیراخلاقی رقص کے علاوہ نامناسب اشاروں پر یہ پابندی لگائی گئی ہے۔
نوٹیفیکیشن میں جن اداکاراؤں کے نام شامل ہیں اُن میں معروف پرفارمر ماہی راجپوت، حنا شیخ، مدیحہ خان، مہک نور اور مانو ملتان، ملائکہ شہزادی، رائمہ مہر اور حُسنیٰ جٹ شامل ہیں۔
محکمے نے ہدایت کی ہے کہ متعلقہ حکام پابندی کے احکامات سختی سے نافذ کریں اور مانیٹرنگ رپورٹس کی روشنی میں مزید کارروائیاں ممکن بنائیں۔
پنجاب کونسل آف دی آرٹس (پُکار) کے ڈائریکٹر مغیث بن عزیز نے کہا کہ سٹیج ڈراموں کی مانیٹرنگ رپورٹوں کی بنیاد پر پنجاب بھر میں کارروائی کی جا رہی ہے اور خلاف ورزی کرنے والوں کے خلاف ایک جیسی کارروائی عمل میں لائی جائے گی۔
محکمے کی طرف سے جاری بیان میں مزید تفصیلات یا اپیل کے طریقہ کار کا ذکر نہیں کیا گیا جبکہ پابندی کے نوٹیفیکیشن کو عدالت میں چیلنج کرنے کے امکانات اور متعلقہ فنکاروں کے جوابی بیانات تاحال منظر عام پر نہیں آئے۔
