حکومت کا ڈیرہ اسماعیل خان میں مطلوب دہشت گردوں کیلئے ایک کروڑ روپے تک انعام کا اعلان

پشاور (مانیٹرنگ ڈیسک) خیبرپختونخوا حکومت نے ضلع ڈیرہ اسماعیل خان میں مطلوب دہشت گردوں کی فہرست جاری کر کے اطلاعات پر پانچ لاکھ سے ایک کروڑ روپے تک کے نقد انعامات کا اعلان کر دیا ہے۔

خیبر پخوتنخوا حکومت کے مطابق اِس اقدام کا مقصد جاری انسدادِ دہشت گردی آپریشنوں کو مضبوط بنانے اور عوامی تعاون کو اُبھارنا ہے۔

سرکاری بیان میں کہا گیا ہے کہ انعامات کی رقم مشتبہ شخص کے مقدمات اور ملوث ہونے کی نوعیت کے اعتبار سے مختلف ہو گی۔ فہرست میں شامل مطلوب افراد ڈیرہ اسماعیل خان اور ملحقہ علاقوں مثلاً کلّاچی، درابن، درازِنڈہ اور پرووا کے رہائشی ہیں اور وہ متعدد دہشت گردی سے متعلقہ مقدمات میں مطلوب ہیں۔

بیان کے مطابق جن افراد کی طرف سے قابلِ اعتبار معلومات فراہم کی جائیں گی جن کی بنیاد پر مطلوب افراد کی گرفتاری ممکن بنائی جائے گی یا پھر سکیورٹی فورسز کامیاب آپریشن کریں گی تو وہ انعام کے حقدار ہوں گے۔ سرکاری حکام نے تصدیق کی کہ اطلاعات فراہم کرنے والوں کی شناخت سختی سے راز میں رکھی جائے گی تاکہ کسی قسم کا ردِعمل یا خطرہ لاحق نہ ہو۔

انتظامیہ نے عوام سے کہا ہے کہ وہ مشکوک افراد یا سرگرمیوں کی فوری اطلاع متعلقہ قانون نافذ کرنے والے اداروں کو دیں اور ایسے معاملات میں تعاون جاری رکھیں تاکہ ضلع میں دیرپا امن قائم کیا جا سکے۔ اس سلسلے میں معلومات رکھنے والے افراد 0966-9280252 پر رابطہ کر سکتے ہیں۔

بیان میں حکام نے واضح کیا کہ عوامی شراکت انسدادِ دہشت گردی کوششوں کی کامیابی کے لیے ناگزیر ہے اور ضلع میں اَمن و استحکام کو مضبوط بنانے کے لیے دہشت گردی کے خلاف آپریشن جاری رہیں گے۔ انتظامیہ نے ایک مرتبہ پھر اپیل کی کہ شہری سکیورٹی اداروں کے ساتھ مکمل تعاون کریں تاکہ ریاست مخالف سرگرمیوں میں ملوث افراد کو انصاف کے کٹہرے تک پہنچایا جا سکے۔