پی ڈی ایم اے خیبر پختونخوا نے 19 تا 26 جولائی کی بارشوں اور فیلش فلڈز کے نقصانات کی رپورٹ جاری کر دی

پشاور (مانیٹرنگ ڈیسک) صوبائی ڈیزاسٹر مینجمنٹ اتھارٹی (پی ڈی ایم اے) خیبرپختونخوا نے 19 جولائی سے 26 جولائی تک شدید بارشوں اور فلیش فلڈز کے باعث ہونے والے نقصانات کی رپورٹ جاری کی ہے جس میں حادثاتی واقعات میں مجموعی طور پر 32 افراد کی ہلاکتیں درج کی گئی ہیں، متاثرہ اضلاع میں امدادی کارروائیاں جاری ہیں جبکہ ادارے نے شہریوں سے احتیاط کی اپیل کی ہے۔

پی ڈی ایم اے خیبرپختونخوا کی جاری کردہ رپورٹ کے مطابق گزشتہ ہفتے کے دوران کے دوران بارشوں اور اچانک آنے والی سیلابی ریلوں کے نتیجے میں مختلف حادثات میں 32 افراد جاں بحق ہوئے جن میں 13 مرد، تین خواتین اور 16 بچے شامل ہیں۔

رپورٹ میں خبردار کیا گیا ہے کہ شدید بارشوں کے نتیجے میں متعدد اضلاع میں جانی اور مالی نقصان ریکارڈ کیا گیا۔ رپورٹ کے مطابق حالیہ بارشوں کے دوران مزید 26 گھروں کو نقصان پہنچا جن میں 19 مکانات جزوی طور پر جبکہ 7 مکانات مکمل طور پر متاثر ہوئے۔ مزید برآں مجموعی طور پر 19 تا 26 جولائی کے دوران بارشوں اور فلیش فلڈ کے باعث 72 گھروں کو نقصان پہنچا جن میں سے 55 مکانات جزوی اور 17 مکمل طور پر منہدم ہوئے۔

پی ڈی ایم اے نے یہ بھی بتایا کہ مختلف حادثات کے دوران 46 مویشی بھی ہلاک ہوئے، جس سے متاثرہ علاقوں میں رہائشیوں کو معاشی خسارہ اُٹھانا پڑ رہا ہے۔ ادارے کی رپورٹ میں کہا گیا ہے کہ متاثرہ اضلاع کی ضلعی انتظامیہ، ریسکیو ادارے اور متعلقہ محکمے امدادی سرگرمیوں میں مصروف ہیں اور نقصانات کا درست تخمینہ لگانے کے لیے سروے کا عمل جاری ہے۔

پی ڈی ایم اے نے شہریوں سے اپیل کی ہے کہ وہ بارشوں کے دوران غیر ضروری سفر سے گریز کریں، ندی نالوں اور برساتی گزرگاہوں کے قریب جانے سے احتیاط برتیں اور کسی بھی ہنگامی صورتحال میں فوری طور پر متعلقہ اداروں سے رابطہ کریں۔ امدادی و تخمینہ جاتی کارروائیاں جاری ہیں۔