کراچی (نیوز رپورٹر) وفاقی وزیرِ صحت مصطفیٰ کمال نے سندھ میں بنیادی سہولتوں کی عدم فراہمی پر پاکستان پیپلز پارٹی (پی پی پی) کو تنقید کا نشانہ بناتے ہوئے کہا کہ متحدہ قومی موومنٹ (ایم کیو ایم) نئے صوبوں کے مطالبے سے پیچھے نہیں ہٹی۔
کراچی ایئرپورٹ پر پاکستان کے پہلے بین الاقوامی مسافروں کے ویکسینیشن سنٹر کا افتتاح کرنے کے بعد میڈیا سے گفتگو کرتے ہوئے کہا کہ ایم کیو ایم نے ہمیشہ نئے صوبوں کی حمایت کی ہے، پی پی پی برسوں سے حکمران جماعت ہے لیکن شہریوں کو بنیادی سہولیات تک میسر نہیں ہیں۔
اُنہوں نے کہا کہ کراچی میں سات اضلاع ہیں جبکہ لاہور اور پشاور ایک، ایک ضلع ہیں، پی پی پی نے اضلاع کو لسانی بنیادوں پر بنایا، کراچی تقسیم ہو سکتا ہے تو سندھ کیوں نہیں، سندھ 1، سندھ 2 اور سندھ 3 بن جائے تو اِس میں کوئی مسئلہ نہیں ہے۔
وزیر صحت نے یہ بھی کہا کہ پی پی پی 18 سال سے اقتدار میں ہے مگر گٹر سنبھالنے کے قابل نہیں اور بچے کتے کے کاٹنے یا گٹر میں گرنے تک سے محفوظ نہیں۔ اُنہوں نے دعویٰ کیا کہ کراچی سے کشمور تک 80 فیصد لوگ صاف پینے کے پانی تک رسائی نہیں رکھتے۔
انہوں نے آئینی ترامیم پر بھی تبصرہ کرتے ہوئے کہا 28ویں ترمیم ہو گی کہ نہیں یہ اُنہیں معلوم نہیں تاہم 27ویں ترمیم میں اختیارات محلے کی سطح پر منتقل کرنے کے لیے تھی لیکن پی پی پی نے اِسے قبول نہیں کیا اور اِسے حصے کو ترمیم سے نکلوا دیا۔
