موچی (سپورٹس ڈیسک) پاکستان کی جونیئر ہاکی ٹیم نے ’’اے ایچ ایف‘‘ مردانہ جونیئر ایشیاء کپ 2026ء کے اہم میچ میں میزبان چین کو چار۔دو سے شکست دے دی۔
میچ چین کے شہر موچی میں ہفتے کو کھیلا گیا جہاں پاکستانی ٹیم نے ابتدائی دباؤ دے کر برتری حاصل کی۔
حمزہ فیاض نے حملے کی بنیاد رکھی۔ اُنہوں نے دوسرے اور 51 ویں منٹ میں دو گول کرتے ہوئے ٹیم کو مضبوط برتری دلوائی۔ ندیم خان نے 18ویں منٹ میں پینلٹی کارنر کا فائدہ اُٹھایا جبکہ عبدالسامی نے 35ویں منٹ میں فیلڈ گول داغ کر ٹیم کو واضح برتری دلا دی۔
چین نے دوسرے ہاف میں واپسی کی کوشش کی اور شارٹ کارنر سپیشلسٹ وانگ یوبو نے 26ویں منٹ میں گول سکور کیا جس کے بعد آو ڈونگزی 54ویں منٹ میں فیلڈ گول کرنے میں کامیاب ہوئے تاہم پاکستان نے بہتر کھیل پیش کرتے ہوئے میزبان ٹیم کو جیتنے کا موقع فراہم نہیں کیا۔
میچ کے دوران پاکستانی نوجوانوں کا حملہ اور منظم دفاع واضح رہا جس نے چین کے دباؤ کو ناکام بنایا۔ یہ فتح پاکستانی ٹیم کو ٹورنامنٹ میں اہم حوصلہ اور اگلے میچوں کے لیے رفتار فراہم کرتی ہے کیونکہ ٹیم اپنے اباقی میچوں میں اچھا مظاہرہ کر کے لیڈنگ پوزیشن حاصل کرنے کی کوشش کرے گی۔
پاکستان ہاکی فیڈریشن (پی ایچ ایف) کے صدر محی الدین احمد وانی نے کھلاڑیوں اور ٹیم عہدیداروں کو مبارک باد دی اور اُن کی کارکردگی کی تعریف کی، جبکہ ٹورنامنٹ کو نوجوان کھلاڑیوں کے لیے بین الاقوامی سطح پر اپنی اہلیت دکھانے کا اہم موقع قرار دیا گیا ہے۔
یہ میچ پاکستانی جونیئر سائیڈ کے لیے نہ صرف پوائنٹس بلکہ اعتماد بڑھانے والا موقع بھی ثابت ہوا، ٹیم اب اگلے مرحلے کے لیے اپنی جیت برقرار رکھنے کی کوشش کرے گی۔
