اسلام آباد (بیورو رپورٹ) پاکستان پیپلز پارٹی (پی پی پی) نے قومی اسمبلی کی سٹینڈنگ کمیٹی برائے پیٹرولیم کے اجلاس میں حکومت کے دو گیس ریونیو سے متعلق ترمیمی بلوں پر کارروائی روک دی جس کے بعد کمیٹی نے دونوں بل مؤخر کر دیے۔ پارٹی رہنماؤں نے اپنا تعاون روکنے کی وجہ آزاد جموں و کشمیر کے حالیہ انتخابات اور صوبائی تقسیم سے متعلق اختلافات کو قرار دیے۔
سابق وفاقی وزیر برائے پیٹرولیم و خزانہ سید نوید قمر نے اجلاس کے آغاز میں ہی قدرتی گیس (ڈیولپمنٹ سرچارج) ترمیمی بل اور گیس انفراسٹرکچر ڈیولپمنٹ سیس (جی آئی ڈی سی) ترمیمی بل پر بحث نہ کرنے کی درخواست کی۔
پیٹرولیم ڈویژن نے جی آئی ڈی سی بل میں ترامیم کے ذریعے فنڈز کے استعمال کے دائرہ کار کو بڑھانے کی تجویز دی تھی تاکہ اِسے موجودہ مخصوص مینڈیٹ سے آگے بڑھا کر سٹریٹجک تیل اور گیس ذخائر کے قیام کے لیے استعمال کرتے ہوئے پاکستان۔ایران، ترکمانستان۔پاکستان اور کراس کنٹری گیس پائپ لائنوں کے ترقیاتی کاموں کے علاوہ دیگر اہداف شامل کیے جا سکیں۔ رپورٹ کے مطابق عوامی خزانے میں تقریباً 295 ارب روپے غیر استعمال شدہ پڑے ہیں، جبکہ کھاد بنانے والی کمپنیوں کی جانب سے صارفین سے اکٹھے کیے گئے 400 ارب روپے سے زائد قانونی پیچیدگیوں کی وجہ سے قومی خزانے میں نہیں آئے۔
اجلاس کے بعد میڈیا سے گفتگو میں سید نوید قمر نے کہا کہ پی پی پی حکومت کی اتحادی جماعت نہیں بلکہ حکومت کی حمایت کر رہی تھی اور یہ رشتہ یکطرفہ طور پر ہمیشہ جاری نہیں رہ سکتا۔ اُنہوں نے کہا کہ پارٹی نے حکومت کو چند تحفظات پہنچائے ہیں جن میں آزاد جموں اور کشمیر کے انتخابات کے علاوہ ججوں کی تقرریاں اور دیگر معاملات شامل ہیں، اگر حکومت کو پی پی پی کی حمایت درکار ہے تو اِن مسائل کو حل کرنا ہو گا۔
نوید قمر نے مزید کہا کہ حکومت نے کمیٹی میں ایک بِل زبردستی پاس کرانے کی کوشش کی تھی اور اسلام آباد لوکل گورنمنٹ بل خود پی پی پی کے لیے قابل قبول نہیں ہے جس پر پارٹی نے اختلافی نوٹ جمع کروایا ہے۔ اُن کے مطابق پیپلز پارٹی نے رویے میں کسی واضح پیشرفت دیکھنے تک حکومت کی حمایت روکنے کا فیصلہ کیا ہے۔
