اسلام آباد (بیورو رپورٹ) فیڈرل بورڈ آف ریونیو (ایف بی آر) نے اپنے تمام افسروں اور ملازمین کو آخری بار انتباہ کرتے ہوئے ہدایت جاری کی ہے کہ وہ اپنی یا اپنے اہلِ خانہ کی کسی بھی بیرونی شہریت، پاسپورٹ، سفری دستاویزات اور غیرملکی شہریوں سے شادی کی تفصیلات فوراً جمع کروائیں، 90 دن کی مدت 30 اگست کو ختم ہو چکی ہے اور عدم تعمیل پر تادیبی کارروائی کی جا سکتی ہے۔
فیڈرل بورڈ آف ریونیو (ایف بی آر) نے ایک حتمی یاد دہانی جاری کرتے ہوئے اپنے افسروں اور عملے کو خبردار کیا ہے کہ جنہوں نے بیانات جمع نہیں کروائے وہ فوری طور پر مطلوبہ معلومات جمع کرائیں۔
حکم نامہ دونوں کسٹمز اور اِن لینڈ ریونیو یعنی دونوں شعبہ جات کے افسروں اور عملے پر لاگو ہوتا ہے۔ دستاویزات میں کہا گیا ہے کہ افسر اپنے قبضے میں موجود کسی بھی بیرونی پاسپورٹ یا دیگر سفری دستاویز کی تفصیل بھی دیں۔ جن افسروں نے غیرملکی شہریوں سے شادیاں کر رکھی ہیں، اُنہیں اپنی شادی کی تفصیلات جمع کرانا ہوں گی۔
ایف بی آر نے کہا ہے کہ مکمل شدہ فارم متعلقہ مینجمنٹ وِنگ کے سیکریٹریوں کو ای میل کے ذریعے بھیجنا ہوں گے۔ نوٹیفیکیشن میں واضح کیا گیا ہے کہ مطلوبہ اعلان نہ کرنا یا غلط معلومات فراہم کرنا تادیبی کارروائی کا سبب بن سکتا ہے۔ عدم تعمیل کو متعلقہ سِول سروس قوانین کے تحت بد انتظامی سمجھا جا سکتا ہے جبکہ جھوٹی یا گمراہ کن معلومات دینے کی صورت میں ’’سِول سرونٹس (ایفیشنسی اینڈ ڈسیپلِن) رولز، 2020ء‘‘ کے تحت کارروائی کا آغاز کیا جا سکتا ہے۔
حکم میں یہ بھی کہا گیا ہے کہ افسر اپنی فیملی کے بیرونی شہریت کے بارے میں بھی متعلقہ بھری ہوئی فارم جمع کروائیں یعنی انفرادی بیان میں اہلِ خانہ کی حیثیت بھی شامل کی جائے۔
سرکاری ہدایت میں تمام متعلقہ افسروں کو کہا گیا ہے کہ وہ فوری طور پر اِس ہدایت کی تعمیل کو یقینی بنائیں۔ ایف بی آر نے کسی مخصوص جرمانے یا ضمیمی سزا کی تفصیلات جاری نہیں کیں مگر تادیبی اور انتظامی کارروائیوں کی وارننگ واضح رکھی گئی ہے۔
