میجر جنرل امیر حاتمی : ایرانی بیس نسلوں تک بھی لڑیں گے، دشمن کو یہ بات معلوم ہونی چاہیے.

ایرانی آرمی چیف کا انتباہ، وطن کے دفاع کے لیے نسلوں تک جنگ لڑیں گے

ایرانی آرمی کے کمانڈر انچیف میجر جنرل امیر حاتمی نے ایران کے مخالفین کو سخت انتباہ دیتے ہوئے کہا ہے کہ ایرانی قوم اپنی خودمختاری اور ملکی سلامتی کے دفاع کے لیے نسلوں تک لڑنے کے لیے تیار ہے۔ مشہد میں ایک تقریب سے خطاب کرتے ہوئے حاتمی نے کہا کہ ایران کو نقصان پہنچانے یا ملک کا نقشہ تبدیل کرنے کی کوششوں کے خلاف “10 نسلیں، 20 نسلیں” بھی لڑنا پڑیں تو لڑیں گے۔

ایرانی آرمی چیف کے مطابق مسلح افواج اپنے مخالفین کے قلیل، درمیانی اور طویل مدتی منصوبوں پر نظر رکھے ہوئے ہیں اور ہر ممکن صورتحال سے نمٹنے کے لیے تیار ہیں۔ انہوں نے بالخصوص امریکہ اور اسرائیل کو خبردار کرتے ہوئے کہا کہ ایران کسی بھی غیر ملکی منصوبہ بندی یا فوجی مہم جوئی کے لیے “تجربہ گاہ” نہیں بنے گا۔ یہ بیان ایران، امریکہ اور اسرائیل کے درمیان جاری شدید علاقائی کشیدگی کے دوران سامنے آیا ہے۔