دفاعی وزیر خواجہ آصف نے کہا ہے کہ سابق وزیرِِاعظم عمران خان کے بیٹے قاسم اور سلیمان خان چاہیں تو آج ہی پاکستان آ سکتے ہیں کیونکہ اُن کے قومی شناختی کارڈ برائے بیرونِ ملک پاکستانی (نائکوپ) کارگر ہیں۔ اہلِ خانہ کا دعویٰ کیا تھا کہ کارڈز کی میعاد ختم ہے اور حکومت ویزہ دینے سے انکار کر رہی ہے۔
اسلام آباد (مانیٹرنگ ڈیسک) دفاعی وزیرِ خواجہ آصف نے اتوار کو کہا کہ پاکستان تحریکِ انصاف (پی ٹی آئی) کے بانی عمران خان کے بیٹے قاسم اور سلیمان خان پاکستان آ سکتے ہیں کیونکہ ان کے نائکوپس زائد المعیاد نہیں ہیں۔
سوشل میڈیا پوسٹ میں وزیرِ دفاع کا کہنا تھا کہ دونوں بھائیوں نے آخر بار اپنے نائکوپ کے ذریعے نومبر 2022ء میں پاکستان کا سفر کیا تھا۔ اُنہوں نے قاسم اور سلیمان کے نائکوپ نمبرشیئر کرتے ہوئے کہا کہ قاسم کا کارڈ 8 نومبر 2032ء جبکہ سلیمان کا کارڈ 6 جنوری 2030 تک مؤثر ہے۔
اُن کا موقف تھا کہ حکومت کی طرف سے ویزے روکنے کا تاثرغلط ہے، پی ٹی آئی اور عمران کے اہلِ خانہ یہ کہانی گھڑ رہے ہیں۔ ایک روز قبل وزارت اطلاعات و نشریات نے بھی یہی کہا تھا کہ قاسم اور سلیمان اپنے نائکوپ کے ذریعے ملک داخل ہو سکتے ہیں تاہم ملاقات یا جیل میں رسائی کی ضمانت نہیں دی جا سکتی۔
قاسم اور اُن کے بڑے بھائی سلیمان لندن میں اپنی والدہ اور عمران کی سابقہ زوجہ جمائمہ گولڈ سمتھ کے ساتھ مقیم ہیں اور اگر وہ اپنے والد سے ملنا چاہیں تو اُنہیں پاکستان کا سفر کرنا ہوگا۔ یاد رہے کہ عمران خان سزا یافتہ ہیں اور راولپنڈی کی اڈیالہ جیل میں قید ہیں۔
پچھلے سال دسمبر میں قاسم نے کہا تھا کہ انہوں نے ویزوں کے لیے درخواستیں دے رکھی ہیں جس کے بعد فروری میں اُنہوں نے الزام لگایا کہ حکومت جان بوجھ کر اُن کے اور بھائی کے ویزے جاری نہیں کر رہی۔ اِس معاملے پر جمائما گولڈ سمتھ نے وزیرِِاعظم شہباز شریف سے براہِ راست اپیل بھی کی تھی۔
حکومت کی طرف سے ویزے کے متبادل کے طور پر نائکوپ کے استعمال کی تجویز پر جمائما نے خدشہ ظاہر کیا کہ نائکوپ پر سفر کرنے سے برطانوی حفاظتی تحفظ ختم ہو سکتا ہے اور اُن کے بیٹوں کو پاکستان پہنچ کر گرفتار کیا جا سکتا ہے۔
یاد رہے کہ عمران خان کو 5 اگست 2023ء کو توشہ خانہ کے کیس میں قید کی سزا سنائی گئی تھی۔ وہ 190 ملین پاؤنڈ کیس میں 14 سال کی سزا بھی بھگت رہے ہیں، دسمبر 2025ء میں اُنہیں توشہ خانہ مقدمے میں سزا سنائی گئی تھی جبکہ اُن کے خلاف 9 مئی 2023ء کے فسادات سے متعلق دہشت گردی کے مقدمات زیرِ سماعت ہیں۔
