لاہور (سٹاف رپورٹر) لاہور لیڈز یونیورسٹی کے زیرِ اہتمام فلیٹیز ہوٹل میں منعقدہ کانفرنس میں ’’اچھی حکمرانی اور تباہ حال نظام کی ازسرِنو تعمیر‘‘ کے موضوع پر مباحثے اور تجاویز پیش کی گئیں، جہاں معروف سیاسی رہنمائوں سمیت اساتذہ، طلبہ اور دیگر معزز شخصیات نے شرکت کی۔
منتظمین کے مطابق اِس کانفرنس کا مقصد حکمرانی کے موجودہ مسائل، ادارہ جاتی کمزوریوں اور ممکنہ اصلاحی لائحہ عمل پر گفت و شنید اور تجویز سازی تھا۔
کانفرنس میں شرکاء نے مباحثے کے دوران پالیسی سازی، شفافیت، عوامی شمولیت اور ادارہ جاتی اصلاحات جیسے امور پر تبادلۂ خیال کیا۔
منتظمین کے مطابق مختلف سیشنوں میں ماہرین نے حکمرانی کے بین الاقوامی نمونوں، مقامی چیلنجوں اور اصلاحی اقدامات کے عملی طریقوں پر تقاریر کیں جبکہ شرکاء نے تعلیمی اور سیاسی حلقوں کے مابین بہتر تعاون کی ضرورت پر زور دیا۔
کانفرنس کے اختتامی سیشن میں آئندہ کارروائیوں اور سفارشات کو مرتب کرنے کے لیے ورکنگ گروپس تشکیل دینے کا اعلان کیا گیا، جن سے توقع ہے کہ وہ سفارشات کو حکومتی اور عوامی فورمز تک پہنچائیں گے۔
