سیکورٹیز اینڈ ایکسچینج کمیشن آف پاکستان (ایس ای سی پی) نے سرکلر نمبر 19/2026 کے ذریعے ملک میں اے پی آئی بنیاد پر مکمل ڈیجیٹل، 24/7 خودکار سرمایہ کار آن بورڈنگ فریم ورک نافذ کرنے کا اعلان کیا ہے، جس سے فوری یونیک شناختی نمبرز (یو آئی این)، سی ڈی سی سب اکاؤنٹس اور کسٹمر اکاؤنٹس کی خودکار انٹیگریشن ممکن ہو گی۔
ایس ای سی پی کے نئے فریم ورک کے تحت سنٹرلائزڈ نَو یور کسٹمر آرگنائزیشن (سی کے او)، سنٹرل ڈپازٹری کمپنی (سی ڈی سی) اور نیشنل کلیرنگ کمپنی آف پاکستان لمیٹڈ (این سی سی پی ایل) مجاز مارکیٹ ثالثوں کے ساتھ مربوط ہوں گے تاکہ آن بورڈنگ عمل خودکار اور تیز تر بنایا جا سکے۔
یہ نظام بغیر انسانی مداخلت کے چوبیس گھنٹے، سات روز آپریشنل رہے گا اور اے پی آئی بنیاد پر یو آئی اینز کی فوری اجراء، سی ڈی سی سب اکاؤنٹس کھولنے اور صارفین کے اکاؤنٹس کے ساتھ براہِ راست تکمیل کی سہولت فراہم کرے گا۔ اس سے سرمایہ کاروں کو بار بار ایک ہی معلومات مختلف ثالثوں کو دینے کی ضرورت کم ہو جائے گی۔
نئے فریم ورک میں سنٹرلائزڈ گیٹ وے پورٹل (سی جی پی) کا کلیدی کردار ہے، جو منظور شدہ ثالثوں کے آن لائن اکاؤنٹ کھولنے کے پورٹلز کو مرکزی آن بورڈنگ انفراسٹرکچر کے ساتھ مربوط کرے گا۔ ثالثوں کو اپنے آن لائن پورٹلز کو سی جی پی کے ساتھ مربوط کرنا اور رہائشی صارفین کے متعلق معلومات و دستاویزات باقاعدگی سے اپ ڈیٹ کرنا لازمی ہوگا، بشرطیکہ صارف کی رضامندی حاصل ہو۔
ایس ای سی پی نے کہا ہے کہ اگر شناخت کی تصدیق پہلے سے مجاز بینکوں، ڈیجیٹل بینکوں، مائیکروفنانس بینکوں یا اسٹیٹ بینک آف پاکستان (ایس بی پی) کے ریگولیٹڈ الیکٹرانک منی اداروں نے کر دی ہو تو ثالثوں کو دوبارہ وہی تصدیق دہرانے کی ضرورت نہیں پڑے گی۔ جہاں آئی بی اے این پہلے سے جنریٹ یا ویریفائی ہو چکا ہو، وہاں بھی دوبارہ چیک کی شرط نہیں رکھی گئی۔ موبائل نمبرز اور ای میل کی بعض تصدیقیں بھی اسی بنیاد پر مستثنیٰ ہو سکتی ہیں۔
فریم ورک میں ڈیٹا کی حفاظت، انکرپشن اور اے پی آئی بنیاد پر محفوظ ڈیٹا ٹرانسمیشن پر زور دیا گیا ہے تاکہ ڈیٹا کی درستگی، سالمیت، رازداری اور آڈیٹ ایبلٹی بہتر ہو اور دستی عمل کم ہوں۔
ڈیجیٹل آن بورڈنگ رہائشی و غیر رہائشی، افراد اور کمپنیوں، اکیلے اور مشترکہ اکاؤنٹس دونوں کے لیے دستیاب ہوگی۔ تاہم، اینٹی منی لانڈرنگ/فنانسنگ آف ٹیررازم (اے ایم ایل/سی ایف ٹی) کے تقاضے اور مسلسل نگرانی، رسک بیسڈ ڈیو ڈیلجنس، سینی کشنز اسکیرننگ اور مشکوک لین دین کی رپورٹنگ مجاز ثالثوں کی ذمہ داری برقرار رہے گی۔
یہ فریم ورک سرکلر نمبر 6/2023 کی جگہ لے گا اور مخصوص ثالثوں کو تین ماہ کا وقفہ دیا گیا ہے تاکہ وہ اپنے اکاؤنٹ کھولنے کے فارم اپ ڈیٹ کریں اور مرکزی ڈیجیٹل پلیٹ فارمز کے ساتھ لازم کنیکٹیویٹی قائم کریں۔
