بھارت کا اسلام آباد (ایس سی او) اجلاس میں شرکت کا فیصلہ
بھارت نے پاکستان میں جاری شنگھائی تعاون تنظیم (ایس سی او) کے اجلاس میں اپنا وفد بھیج دیا ہے، جو دونوں ممالک کے درمیان شدید کشیدگی کے باوجود ایک اہم سفارتی پیش رفت ہے۔ بھارتی وفد کی قیادت وزارتِ خارجہ کے ایڈیشنل سیکریٹری اور (ایس سی او) نیشنل کوآرڈینیٹر آلوک دیمری کر رہے ہیں۔ تین روزہ (قومی کوآرڈینیٹرز کی کونسل) اجلاس 28 سے 30 ستمبر تک اسلام آباد میں جاری ہے۔
یہ اجلاس پاکستان کی 2026-27 کی (ایس سی او) چیئرمین شپ کے تحت پہلا اہم اجلاس ہے۔ پاکستان نے یکم ستمبر کو کرغزستان سے تنظیم کی چیئرمین شپ سنبھالی تھی اور آئندہ سال اگست میں (ایس سی او) سربراہانِ مملکت کا اجلاس بھی اسلام آباد میں میزبانی کرنے والا ہے۔
پاکستان نے اپنی چیئرمین شپ کے لیے ”وژن کو عمل میں بدلنا: باہمی رابطہ، جدت اور مشترکہ خوشحالی“ کا نعرہ منتخب کیا ہے، جس کے تحت علاقائی رابطہ کاری، اقتصادی تعاون، جدت، ٹیکنالوجی اور عوامی روابط کو ترجیح دی جائے گی۔ موجودہ اجلاس میں تنظیم کے سالانہ پروگرام، آئندہ وزارتی اجلاسوں اور 2027 کے سربراہ اجلاس کی تیاریوں پر گفتگو ہورہی ہے۔
اس پیش رفت کی تاریخی اہمیت پاک بھارت تعلقات کے موجودہ پس منظر میں مزید بڑھ جاتی ہے۔ دونوں ممالک 2017 میں (ایس سی او) کے مکمل رکن بنے تھے، جس کے بعد تنظیم ایک ایسا کثیرالجہتی پلیٹ فارم بن گئی جہاں دونوں ممالک اپنے دوطرفہ اختلافات کے باوجود ایک ہی فورم پر شریک ہوتے رہے ہیں۔ اکتوبر 2024 میں بھارتی وزیر خارجہ ایس جے شنکر کا اسلام آباد میں (ایس سی او) اجلاس میں شرکت کرنا بھی تقریباً نو برس بعد کسی بھارتی وزیر خارجہ کا پاکستان کا دورہ تھا۔
تازہ شرکت اس لیے بھی قابلِ ذکر ہے کہ گزشتہ سال کے فوجی تصادم اور مسلسل کشیدہ تعلقات کے باوجود بھارت نے (ایس سی او) کے ادارہ جاتی اجلاس سے خود کو الگ نہیں کیا۔ بھارتی حکام کا مؤقف ہے کہ دوطرفہ رابطے کے لیے سازگار ماحول ضروری ہے، تاہم بھارت (ایس سی او) کے کثیرالجہتی فریم ورک میں شرکت جاری رکھے گا۔ آئندہ سب سے زیادہ توجہ اگست 2027 کے اسلام آباد (ایس سی او) سربراہ اجلاس پر ہوگی۔ پاکستان نے تمام رکن ممالک کے سربراہان کو مدعو کرنے کا عندیہ دیا ہے
.
