(بی بی سی اردو) برطانیہ میں نقاب پوش افراد نے ایک جوڑے کے گھر میں داخل ہو کر متاثرہ شخص پر ہتھوڑوں سے حملہ کیا، حاملہ بیوی کو قتل کی دھمکی دے کر ان کی کرپٹو کرنسی میں لاکھوں پاؤنڈ کی جمع پونجی ویڈیو کال کے ذریعے منتقل کروالی گئی، پولیس تحقیقات کر رہی ہے۔
ایک جوڑے کو نشانہ بنانے والے اس پرتشدد واقعے کا بی بی سی کو بتایا گیا تفصیلانصر یہ ہے کہ نقاب پوش تین افراد نے متاثرہ شخص کے سولی ہل میں واقع گھر میں زبردستی داخل ہو کر تشدد شروع کیا، جو تقریباً 45 منٹ تک جاری رہا۔ متاثرہ شخص، جسے بی بی سی نے ’جیمز‘ کا فرضی نام دیا، نے کہا کہ دروازہ دھکا دے کر کھولا گیا اور حملہ آور دستانے اور بالاکلاوا پہنے ہوئے تھے۔
جیمز نے کہا کہ حملہ آوروں نے ان کے چہرے، سر اور پسلیوں پر ہتھوڑوں سے وار کیے جبکہ ان کی سات ماہ کی حاملہ اہلیہ کو صوفے پر دبا کر رکھا گیا اور اس کے چہرے پر تکیہ رکھا گیا جس سے وہ سانس لینے سے قاصر ہو گئی تھیں۔ جوڑے کو ابتدائی طور پر معلوم نہیں تھا کہ ملزمان کیا چاہتے ہیں، پھر ایک شخص نے مطالبہ کیا کہ جیمز اپنا فون ڈیجیٹل رسائی دکھائے۔
حملہ آور بظاہر کسی دوسرے فرد کی ہدایات پر عمل کر رہے تھے جو ویڈیو کال پر موجود تھا؛ کال پر موجود شخص نے کرپٹو والیٹ میں موجود اثاثے دکھانے کا کہا۔ جب انہیں کرپٹو والیٹ میں بڑی رقم نظر آئی تو دھمکیاں مزید سخت ہو گئیں اور جیمز نے اپنے بچے اور بیوی کی جان کے خوف سے اپنی کرپٹو سیونگز ویڈیو کال پر موجود شخص کے ڈیجیٹل والیٹ میں منتقل کر دیں۔ حملہ آور روانگی سے قبل کئی قیمتی گھڑیاں بھی چوری کر گئے۔
یہ واقعہ گھر کے سکیورٹی کیمروں میں ریکارڈ ہوا اور پولیس تحقیقات کر رہی ہے۔ کرائم سٹاپرز نے اس حملے کے بارے میں معلومات دینے والے کو 10,000 پاؤنڈ انعام کا اعلان کیا ہے۔
ماہرین کے مطابق اس طرح کی تشدد آمیز ڈکیتیاں، جنھیں ’رینچ اٹیکس‘ کہا جاتا ہے، بڑھ رہی ہیں اور کرپٹو کرنسی رکھنے والے افراد کو ایک پرکشش ہدف بنا رہی ہیں کیونکہ تیز رفتار لین دین، نسبتاﹰ گمنامی اور ایک بار منتقلی کے بعد رقم کی واپسی مشکل ہوتی ہے۔ چین اینالیسس کے ماہرین نے بتایا ہے کہ رواں سال جون تک پُرتشدد ڈکیتیوں کے ذریعے تقریباً 30 ملین ڈالر (22.6 ملین پاؤنڈ) سے زیادہ مالیت کی کرپٹو کرنسی چرائی جا چکی تھی، جس کی بنیاد پر 2026 کو کرپٹو سے متعلق پُرتشدد حملوں کا ایک بدترین سال قرار دیا جا رہا ہے۔
بی بی سی کے مطابق ایسے واقعات فرانس، امریکہ، برازیل، تھائی لینڈ اور فلپائن میں بھی رپورٹ ہوئے ہیں۔ متاثرہ جوڑے نے اپنی شناخت ظاہر نہ کرنے کی درخواست کی ہے، اور حملے کے نفسیاتی اثرات بالخصوص حاملہ خاتون پر شدید رہے جنہوں نے حمل کے دوران ذہنی دباؤ کے باعث بچے کے محفوظ رہنے کے لیے خدشات کا اظہار کیا۔ پولیس تحقیقات اور ممکنہ گرفتاریوں کے بارے میں تاحال مزید تفصیلات موصول نہیں ہوئیں۔
