برطانیہ میں آر اے ایف فیئر فورڈ کے قریب پانچ افراد کی گرفتاری نے سکیورٹی خدشات کو بڑھا دیا ہے، کیونکہ یہ اڈہ امریکی فضائیہ کی جانب سے ایران کے خلاف کارروائیوں کے لیے استعمال ہوتا رہا ہے۔
برطانوی انسدادِ دہشت گردی پولیس کے مطابق اتوار کی علی الصبح تین مشتبہ وینز کے ایئربیس کی جانب جانے کی اطلاع ملنے کے بعد مسلح پولیس نے کارروائی کرتے ہوئے پانچ افراد کو گرفتار کیا۔ انہیں پہلے ایکسپلوزو ایکٹ کے تحت اور بعد ازاں دہشت گرد کارروائی کی تیاری کے شبہے میں حراست میں لیا گیا۔
تقریباً 85 گھروں کو احتیاطاً خالی کرایا گیا جبکہ فوج کی بم ڈسپوزل ٹیم نے مشتبہ گاڑیوں کا معائنہ شروع کیا۔ تین وینز کے گرد تقریباً 400 میٹر کا حفاظتی حصار قائم کیا گیا۔ پولیس نے کہا ہے کہ واقعہ فی الحال قابو میں ہے، تاہم تحقیقات ابتدائی مرحلے میں ہیں اور پانچوں افراد زیرِ حراست ہیں۔
ایران پر شبہ کی ایک اہم وجہ آر اے ایف فیئر فورڈ کا موجودہ فوجی کردار ہے۔ برطانوی حکومت نے امریکی افواج کو اس اڈے سے ایران کے خلاف کارروائیوں کے لیے استعمال کی اجازت دی ہے۔ اس سے قبل ایران کے پاسدارانِ انقلاب نے برطانیہ کو خبردار بھی کیا تھا کہ اگر فیئر فورڈ سے امریکی بمبار ایران کے خلاف استعمال ہوئے تو ایسے اڈے کو ہدف سمجھا جاسکتا ہے۔
تاہم ابھی یہ ثابت نہیں ہوا کہ گرفتار افراد ایران سے وابستہ تھے یا انہیں ایرانی حکومت نے بھیجا تھا۔ ’’دی آئرش ٹائمز اور گارڈیئن‘‘ کے مطابق تفتیش کار اِس امکان کو ضرور دیکھ رہے ہیں کہ کسی ریاست، بشمول ایران، کا کردار ہوسکتا ہے، مگر حکام نے تمام امکانات کھلے رکھے ہیں۔
