لاہور (سپورٹس رپورٹر) قذافی سٹیڈیم لاہور میں منگل کے روز کھیلے گئے سہ ملکی ون ڈے سیریز کے میچ میں سری لنکا نے پاکستان کو ہرا کر انگلینڈ کے فائنل میں پہنچنے کی تمام امکانات ختم کر دیے۔
پاکستانی ٹیم پہلے بیٹنگ کرتے ہوئے محض 25.3 اوورز میں 110 رنز بنا کر ڈھیر ہو گئی جس کے بعد سری لنکا نے 111 رنز کا ہدف آسانی کے ساتھ حاصل کر لیا۔
سہ ملکی سیریز کے گزشتہ میچ میں انگلینڈ کے خلاف 430 رنز کا ہدف نہ حاصل کر سکنے والی سری لنکن ٹیم اب ایک بار پھر اُس کے مقابل ہوگی تاہم اِس میچ کا فائنل پر کوئی اثر نہیں پڑے گا۔
میچ کی تفصیلات کے مطابق دلشان مدوشنکا سری لنکا کی جانب سے نمایاں کھلاڑی رہے جنہوں نے 8.3 اوورز میں 34 رنز دے کر پانچ وکٹیں حاصل کیں جبکہ سہان آرچگے نے دو وکٹیں حاصل کیں۔
سری لنکن بائولرز کے سامنے پاکستانی بیٹسمین شدید مشکلات کا شکار رہے۔ یاد رہے کہ انگلینڈ کے خلاف میچ میں بھی پاکستان کی بیٹنگ ناکام رہی تھی جہاں 242 رنز کے ہدف کے تعاقب میں ٹیم 155 رنز پر نو وکٹیں گنوا بیٹھی تھی تاہم شاداب خان نے حارث رؤف کے ساتھ آخری وکٹ کے لیے 89 رنز کی شراکت قائم کر کے ٹیم کو ایک ناقابلِ یقین فتح دلائی تھی۔ اُنہوں نے شاندار اور میچ جتوا دینے والی سنچری بنائی تھی۔
سری لنکا کے خلاف شاداب ناکام رہے اور صرف دو رنز ہی بناسکے جبکہ صائم ایوب کی جگہ شامل کیے گئے معاذ صداقت بھی محض آٹھ رنز بنا کر آؤٹ ہوگئے۔
مدوشنکا نے اپنی رفتار اور سوئنگ سے تمام پاکستانی بلے بازوں کو پریشان کیے رکھا ۔ میزبان ٹیم جو اپنے پہلے تینوں میچ جیت کر فائنل کے لیے کوالیفائی کرچکی ہے، پاور پلے میں 46 رنز پر تین وکٹیں گنوا بیٹھی اور اِس کے بعد سينئر بلے بازوں سلمان علی آغا اور بابر اعظم اور شاداب بھی جلد آؤٹ ہو گئے۔
پاکستان کی طرف سے بابر اعظم 33 گیندوں پر 29 رنز بنا کر ٹاپ سکورر رہے جبکہ کپتان شاہین شاہ آفریدی نے 15 اور حسن نواز نے 17 رنز بنائے۔
سری لنکا کی جانب سے اوپنر کامندو مینڈس 60 گیندوں پر 62 رنز بنا کر ناٹ آؤٹ رہے۔
