شام سے عراق کو پٹرول کی ترسیل شروع، آبنائے ہرمز کے بحران کے بعد نیا دو طرفہ توانائی کوریڈور
شام نے عراق کو پٹرول کی سڑک کے ذریعے ترسیل شروع کردی ہے، جس کے بعد دونوں ممالک کے درمیان ایک نیا دو طرفہ توانائی کوریڈور فعال ہوگیا ہے۔ یہ پیش رفت ایسے وقت میں ہوئی ہے جب آبنائے ہرمز میں مسلسل رکاوٹوں نے خلیج سے تیل اور ایندھن کی معمول کی ترسیل کو شدید متاثر کیا ہے۔
رائٹرز کے مطابق شام کے بانیاس آئل ٹرمینل پر درآمد کیا گیا پٹرول اتارا گیا اور وہاں سے ٹینکر ٹرکوں کے ذریعے عراق بھیجا جا رہا ہے۔ شام کی سرکاری پٹرولیم کمپنی کے ریفائننگ ڈائریکٹوریٹ کے سربراہ طارق شلاش کے مطابق تقریباً 32,800 میٹرک ٹن پٹرول لانے والا پہلا کارگو بانیاس پہنچا، جس کے بعد اس کی زمینی منتقلی شروع ہوئی۔ اب تک 77 ٹینکر ٹرک عراقی سرحد کی جانب روانہ ہوچکے ہیں جبکہ مزید لوڈنگ جاری ہے۔
یہی راستہ اس سے قبل عراق سے شام کی طرف ایندھن اور خام تیل کی ترسیل کے لیے استعمال ہورہا تھا۔ عراق نے آبنائے ہرمز میں خلل کے بعد شام کے راستے کو متبادل برآمدی راستے کے طور پر استعمال کرنا شروع کیا تھا۔ بغداد نے عندیہ دیا ہے کہ ہرمز میں بحری آمدورفت معمول پر آنے کے باوجود وہ شام کے ذریعے متبادل راستوں کو ترقی دیتا رہے گا۔
