امریکی فیڈرل ایوی ایشن ایڈمنسٹریشن (ایف اے اے) نے اپریل میں ایک مہم کے ذریعے ویڈیو گیمرز کو ایئر ٹریفک کنٹرولرز کے لیے بھرتی کرنا شروع کیا، جس سے اب تک بھرتیوں کا قریباً 94 فیصد ہدف حاصل ہو چکا ہے۔
واشنگٹن (مانیٹرنگ ڈیسک) امریکی ٹرانسپورٹیشن سیکریٹری کا کہنا ہے کہ ایف اے اے کی گیمرز کو ہدف بنا کر چلائی گئی بھرتی مہم اپریل میں شروع ہونے کے بعد گیم چینجر ثابت ہوئی ہے اور اس سے بھرتی کے پورے عمل میں تیز رفتاری آئی ہے۔
ڈیپارٹمنٹ آف ٹرانسپورٹیشن کا ماننا ہے کہ گیمز کھیلنے سے حاصل ہونے والی صلاحیتیں جیسے مکانی شعور، ایک ساتھ متعدد کام کرنا یا سنبھالنا، تیز فیصلہ سازی، توجہ برقرار رکھنا اور بیک وقت کئی معلومات کا عمل فضائی ٹریفک کنٹرول کے تقاضوں سے میل کھاتی ہیں۔
سیکریٹری نے اپنی ٹویٹ میں لکھا: “🚨 GAME CHANGER In April, we launched a NEW CAMPAIGN to recruit video gamers as air traffic controllers — and supercharged the entire hiring process to get the BEST & BRIGHTEST in faster. The results are HISTORIC ✈️ ✅ 94% of hiring goal met — fastest time ever to reach target… pic.twitter.com/gN3OGmEIBB”
رپورٹ کے مطابق اِس وسیع بھرتی کوشش نے اب تک دو ہزار سے زائد امیدواروں کو متوجہ کیا ہے جبکہ مزید دو ہزار سے زائد امیدوار پراسیس میں ہیں، جس سے ادارہ اپنا بھرتی ہدف کا تقریباً 94 فیصد حاصل کر چکا ہے۔
یہ اقدام اُسوقت سامنے آیا ہے جب ایف اے اے کو طویل عرصے سے عملے کی کمی کا سامنا تھا۔ گورنمنٹ اکاؤنٹیبلٹی آفس کی رپورٹ کے مطابق مالی سال 2025ء کے اختتام پر ایف اے اے کے پاس 13 ہزار 164 کنٹرولرز تھے جو ایک دہائی قبل کے مقابلے میں تقریباً چھ فیصد کم ہیں جبکہ پروازوں کی سرگرمی میں اضافہ ہوا ہے۔
اس پیشے کی مالی پہلو پر بھی روشنی ڈالی گئی ہے کہ امریکی بیورو برائے لیبر سٹیٹکس کے مطابق مئی 2024ء میں ایئر ٹریفک کنٹرولرز کی سالانہ تنخواہ چھہتر ہزار ڈالر سے دو لاکھ 10 ہزار ڈالر سے زیادہ تھی۔
ایف اے اے کے تقاضے اب بھی سخت ہیں: درخواست دہندہ امریکی شہری ہونا چاہیے، عموماً 31 سال سے کم عمر، طبی اور سکیورٹی چیک پاس کرنا ہوں گے، ایجنسی کے پری ایمپلائمنٹ ٹیسٹنگ کا عمل مکمل کرنا ہوگا اور مناسب کام یا تعلیمی تجربہ ظاہر کرنا ہوگا۔ کامیاب امیدوار ایف اے اے کی اوکلاہوما سٹی میں ایجنسی اکیڈمی کی ٹریننگ سمیت خصوصی تربیت میں شامل ہو سکتے ہیں۔
ایف اے اے کا موقف یہ ہے کہ گیمنگ کا تجربہ واحد معیار نہیں بلکہ ممکنہ امیدواروں تک پہنچنے اور وہ صلاحیتیں پہچاننے کا ایک ذریعہ ہے جو ایوی ایشن کنٹرول کے لیے مفید ثابت ہو سکتی ہیں۔
