چین کا ایران پر امریکی پابندیوں کی حکمتِ عملی سے اختلاف، سفارت کاری پر زور
چین نے ایران پر امریکی پابندیوں اور معاشی دباؤ کی حکمتِ عملی کو مسترد کرتے ہوئے کہا ہے کہ ایسے اقدامات مشرقِ وسطیٰ کے جاری تنازع کا حل نہیں ہیں۔ چینل نیوز ایشیا کے مطابق چینی وزارتِ خارجہ کے ترجمان لن جیان نے کہا کہ بحران کا حل سیاسی اور سفارتی ذرائع سے تلاش کیا جانا چاہیے، نہ کہ مزید معاشی دباؤ کے ذریعے۔
چین کا یہ بیان ایسے وقت سامنے آیا ہے جب امریکہ نے چین سمیت دیگر ممالک سے ایران کی معیشت کو عالمی سطح پر تنہا کرنے کی کوششوں میں شامل ہونے پر زور دیا ہے۔ امریکی وزیر خزانہ اسکاٹ بیسنٹ نے بھی تہران پر معاشی دباؤ کی حمایت کی ہے۔ تاہم بیجنگ نے یکطرفہ پابندیوں کی مخالفت کرتے ہوئے کہا کہ ایسی پابندیاں بین الاقوامی قانون یا اقوام متحدہ کی سلامتی کونسل کی منظوری کے بغیر عائد نہیں ہونی چاہئیں۔
یہ اختلاف واشنگٹن اور بیجنگ کے درمیان ایران اور خطے کے مستقبل سے متعلق بڑھتے ہوئے تزویراتی اختلافات کو ظاہر کرتا ہے۔
