پینٹاگون میں صفایا، 20 سے زائد اعلیٰ فوجی و دفاعی حکام عہدوں سے فارغ
امریکی محکمہ دفاع میں ڈیفنس سیکریٹری پیٹ ہیگسیتھ کی قیادت میں اعلیٰ سطح پر اکھاڑ پچھاڑ نے پینٹاگون میں قیادت کے بحران کے خدشات کو جنم دے دیا ہے۔ تازہ امریکی میڈیا رپورٹس کے مطابق ہیگسیتھ کے ڈیفنس سیکریٹری بننے کے بعد کم از کم 20 اعلیٰ فوجی اور سویلین دفاعی حکام یا تو برطرف کیے جا چکے ہیں، عہدوں سے ہٹائے گئے ہیں یا مستعفی ہو چکے ہیں۔
رخصت ہونے والوں میں امریکی فوج، بحریہ اور فضائیہ کے اعلیٰ ترین افسران کے ساتھ اہم انٹیلی جنس، قانونی اور سویلین دفاعی عہدیدار بھی شامل ہیں۔ حالیہ اہم پیش رفت میں آرمی سیکریٹری ڈین ڈرسکول کا استعفیٰ بھی شامل ہے، جس کی باضابطہ وجہ سامنے نہیں آئی، تاہم ان کے اور ہیگسیتھ کے درمیان اعلیٰ فوجی قیادت سے متعلق اختلافات کی اطلاعات موجود ہیں۔
ہیگسیتھ کے دور میں متعدد جنرلز اور ایڈمرلز کو مقررہ مدت مکمل ہونے سے قبل ہٹایا گیا یا ریٹائرمنٹ کی جانب دھکیلا گیا۔ واشنگٹن پوسٹ کے مطابق ان تبدیلیوں میں آرمی چیف جنرل رینڈی جارج، نیوی کے اعلیٰ افسر ایڈمرل ایلِن ہولسی اور دیگر اہم کمانڈروں کی قبل از وقت رخصتی شامل ہے۔
اس کے علاوہ ترقیوں کے عمل میں بھی ہیگسیتھ کی مداخلت پر سوالات اٹھے ہیں۔ نیویارک ٹائمز کے مطابق 2026 میں کم از کم 45 افسران کو ساتھی افسران پر مشتمل سلیکشن بورڈز کی سفارش کے باوجود ترقی کی فہرستوں سے ہٹایا گیا۔ تجزیہ کاروں کے مطابق اتنے بڑے پیمانے پر اعلیٰ قیادت میں تبدیلیاں ایسے وقت میں ہو رہی ہیں جب امریکہ ایران جنگ اور دیگر عالمی سکیورٹی چیلنجز میں براہِ راست مصروف ہے، جس سے فوجی قیادت، ادارہ جاتی تسلسل اور آپریشنل تیاری پر بحث مزید شدت اختیار کر گئی ہے۔
